मेलम्ची । बर्सेनि विपत्ति, भवितव्यबाट ताडित बन्दै आएको सिन्धुपाल्चोक यसवर्ष वर्षात्को सुरुमै बाढीको चपेटामा परेको । गत वर्ष भदौ २७ गते पूर्वीसिन्धुपाल्चोको बाह्रबिसे नगर क्षेत्रको नागपुजेमा अकल्पनीय पहिरो गएको थियो । समथर भूभाग पनि पहिराले भोटेकोसी नदीमा मिसाइदिएपछि त्यहाँका ८० घर परिवार विस्थापित हुन पुगेका थिए । अहिले पनि त्यहाँका नागरिकले घर बनाउन सकेका छैनन् । त्रिपालको ओतमुनि रात बिताउनु परिरहेको छ ।
यस वर्ष वर्षाको सुरुआतमै सिन्धुपाल्चोकको उत्तरपश्चिम क्षेत्रले बाढीको त्रासदी खप्नु परेको छ । पश्चिमी क्षेत्रबाट बगेर आउने मेलम्ची र उत्तरी क्षेत्रबाट बगरे आउने इन्द्रावतीको सङ्गल स्थल भए पनि मेलम्चीको तटवर्ती बजार सुरक्षित नै थियो । बजार क्षेत्रबाट ५० मिटर तलबाट खोलो बग्ने हुनाले डुबानको भय नभएको स्थानीय बताउँछन् ।
तर, हेलम्बु गाउँपालिकाको भ्रातेकतेक (मेलम्ची र तार्के घ्याङको बीचको भूभाग) क्षेत्रमा खसेको पहिरोले नदी थुनिएको थियो । खोलिएको नदीले नै तल्लो तटीय क्षेत्र बगरमा परिणत गरेको हो ।
तिम्ब, किउल, ग्याल्थुम, तालामाराङ, मेलम्ची आदि बजारले अहिले पनि बाढीको धक्का बेहोरिरहेकै छ । पहिराको लेदोसहितको भँगालो बचेखुचेका संरचना खण्डहर बनाइरहेको स्थानीयबासी बताउँछन् । झरी नथामिएकाले विपत्ति टरिनसकेको पनि उनीहरूको भनाइ छ ।
बुधबार दिउँसो मेलम्ची इलाका प्रहरी कार्यालय दक्षिण, मन शान्ति वस्ती पुग्दा माओवादी केन्द्रका स्थानीय नेता श्याम खड्का नदीको भँगालाभित्र परेको आफ्नो घर हेरिरहेका थिए ।
